Երանելի աշխատանք

Թղթեր ա որ թերթում ա
Խորացած
Հիմա եթե ճանճ նստի քթին
Չի նկատի

Ցուցամատը մտցնում ա բերանը
Հանում ու թերթում
Մտցնում բերանը հանում մատն ու թերթում
Հերթական էջը դարսում
Արդեն թքոտված փաստաթղերի կույտի վրա

Շեֆը
Լարած խաղալիքների պես
Շուրջը պտտվում
Հեռախոսով խոսում
Մազերն աչքներից հեռացնում
Մոտենում
Կարճատեսի ակնոցը հանում հեռատեսինը դնում
Գործի ընթացքը ստուգում
Ինչ-որ կիսատ-պռատ մեկնաբանություններ անում

Էս աղջիկն էլ տակից շեֆին նայելով
Մատը մտցնում ա բերանն ու հանում
Գլխով անելով
Մտցնում հանում
Մտցնում հանում թերթում ու դարսում
Ինքնամոռաց

Երբեք տանել չեմ կարողացել
Թերթելիս մատ թքոտելը
Իսկ հիմա
Աշխա՜րհ աշխա՜րհ
Սրճարանի մի անկյունում վեր ընկած
Թուքս եմ մոռացել կուլ տալ
Աչքերս չռած հետևում եմ
Թե ոնց ա չքնաղը
Իմ հաշվարկներով
Արդեն հարյուր չորսերորդ էջը թքոտում

Հինգ-վեց դար առաջ Քուչակ ախպերը երևի կբացականչեր
«Ատ թքոտած թղթերուն կապոցն ի յիս պիտէր
Զիս հազա՛ր դեկան դա գնած
Ու ընթրիքին մատներուս հետ խժռած»
Չէի մերժի ընթրիքի հրավերը
Բայց յիս ուրիշ բան պիտեր կոլեգա

Ջոն ջան ցամաքել է բերանն աշխատողիդ
Ժամական տուր ինչքան դզի սրտիդ
Մենակ թե նստեմ կողքը չքնաղի
Մատը բերանս կամ մատս բերանը
Սուզի հանի հաշվի թաթախի թեթև ու թերթի
Ինչքան փաստաթուղթ որ սիրտդ ուզի

Չէ

Իղձս մեջս պահեմ ավելի լավ

Թե չէ որ առաջարկեմ
Ո՞վ գիտի
Չքնաղը միանգամից կդառնա հրեշ
Մի մատի փոխարեն բերանս բոլոր տասը կմտցնի ու կճոռթի
Ամբողջ դեմքս կդարձնի փրփրած արյունով լի գավաթ
Հետո կոկտեյլի բաժակի միջից անձրևանոցավոր ձողիկը
Կհանի կդնի բերանն ու կսկսի կոկորդիցս
Ցայտող շիթերից թարմ արյունս օդի մեջ որսալ
Ու ագահաբար խռխռոցով ծծել
Սրճարանի մյուս հաճախորդներին հերթ չտալով

Ինչեր ասես որ սարսափի ֆիլմերը մեզ չեն ներշնչի
Ես իհարկե սարսափի ֆիլմեր չեմ նայում
Բայց էս հոլիվուդյան Psychobabble սրճարանը
Ուր ամեն օր վեր ընկած վեպիս վրա եմ աշխատում
Էսօր ամեն ինչ արեց էդ բացը լրացնելու համար
Շուրջս նստած բոլորը սցենարիստի երանելի աշխատանք են բաղձում
Ու որ մեկի լէփթոփի էկրանը որ էսօր աչքս ընկավ
Մի հատ ինչ-որ սահմռկելի տեսարանի դրվագներ էին
Ասում են մեջը լիքը փող կա

Մի հատ էլ նայեմ փաստաթղթերի տրցակի վրա
Տերևի պես ընկնող մատների տիրոջը

Մեկ ա չքնաղ ա

 

 

© Կարեն Ղարսլյան, հունվարի 9, 2006, Լոս Անջելես